traduce

miércoles, 7 de marzo de 2018

DÍA DA MULLER TRABALLADORA

Este xoves 8 de marzo celébrase o Día da Muller Traballadora, na que se conmemora a loita feminina por unha sociedade máis xusta.
A continuación podedes ver un vídeo onde se expoñen os diferentes feitos que levaron ó recoñecemento deste día.

Este ano está convocada unha folga feminista para celebrar esta data. Co lema Se paramos todas, paramos todo continúase a liña de protestas iniciadas fai anos en países como Islandia, Polonia ou Arxentina.

Dende este blog queremos propoñer algunhas lecturas que axudan a educar na igualdade. Pero lembrade que somos nós, nais e pais, coa nosa actitude diaria os que podemos conseguir que as novas xeracións acaden o obxectivo de crear unha sociedade xusta.
Destacamos o conto de A historia dos Bonobos con gafas, do cal podedes ver un vídeo a continuación:

 
Igualmente no seguinte enlace temos as distinfas propostas de Kalandraka sobre este tema:
www.kalandraka.com/blog/wp-content/uploads/2013/03/Lecturas-en-feminino_mar13.jpg

Tamén temos coleccións sobre mulleres destacadas da nosa historia, así, por exemplo, destacamos a obra dedicada a Frida Khalo en Otras princesas. En galego atopamos Mulleres bravas da historia, que nos presenta biografías de mulleres destacadas da cultura galega como Rosalía de Castro ou Maruja Mallo.

martes, 6 de febrero de 2018

CHEGOU O ENTROIDO Ó NOSO COLEXIO


Como vén sendo habitual, esta semana o colexio Laverde Ruíz vólcase en celebrar estas festas de tradición ancestral, propoñendo que cada día da semana os nenos e nenas leven algunha peculiaridade na súa indumentaria: luns no colo, martes na cabeza, mércores a cara pintada e xoves disfraz libre. Para o venres o colexio decidiu rememorar os disfraces tradicionais galegos: peliqueiros, capitáns da Ulla, pantallas, galáns, madamas... percorerán o patio coas súas chocas e coloridos vestidos. Noraboa ó colexio por esta fantástica idea, que permite ós nosos nenos e nenas coñecer unha festa que vai moito máis alá có disfraz de moda. Feliz festa do mundo ó revés a todos!

domingo, 3 de diciembre de 2017

DÍA INTERNACIONAL DAS PERSOAS CON DISCAPACIDADE

En 1992, a Asemblea Xeral de Nacións Unidas proclamou o día 3 de decembro como Día Internacional dos Impedidos. A Asemblea fixo un chamamento ós Estados Membros para que celebraran con especial énfase este Día, con miras a fomentar a integración na sociedade das persoas con discapacidades.

Desde a ANPA Laverde Ruíz consideramos que esta integración debe comezar nos centros educativos, pero tamén somos conscientes de que para lograr este obxectivo fai falla mellorar uns recursos que están sendo sistematicamente reducidos coa desculpa da crise: aumento da ratio alumnado/profesor, redución dos profesores de apoio (PT) e orientadores que comparten dous e tres centros... A isto hai que engadir a falta de formación do profesorado que se atopa totalmente abandonado ante os casos que atopa na clase, e a falta de implicación da Consellería, que non ofrece ningún tipo de formación necesaria para traballar con calquera neno con Necesidades Educativas Especiais (NEE).

Recomendámosvos ver este vídeo, onde Constanza Orbaiz, psicopedagoga con parálise cerebral nos relata o seu punto de vista sobre esta problemática.
Tamén podemos botar man de libros e contos accesibles para os máis pequenos. Desde aquí recomendamos O cazo de Lorenzo, de Isabelle Carrier, que nos fala dun neno, Lorenzo, que ten unha minusvalía representada por un cazo, que vai arrastrando e non lle permite facer algunhas cousas igual que os demais. A historia de Lorenzo explícanos como este neno "especial" vive a súa vida coas súas limitacións, e ensínanosa comprendelas, a aprender a vivir con elas e sacarlles todo o proveito do mundo. Todos temos as nosas capacidades e as nosas limitacións, por iso hai que saber identificalas para aprender a vivir con elas.

lunes, 27 de noviembre de 2017

DÍA DO MESTRE

Aínda que desde hai uns anos a Consellería de Educación decidiu non respectar esta data e colocala segundo conveña, o certo é que hoxe, 27 de novembro, é o día dos Mestres. Desde a Anpa queremos darlles os nosos parabéns a tódolos profesionais que se encargan de preparar os nosos fillos e fillas para o seu futuro.
Moitas grazas e feliz día.

viernes, 24 de noviembre de 2017

EN NEGRO, CONTRA A VIOLENCIA

O 25 de novembro celébrase o día contra a violencia machista, unha problemática que sacode a nosa sociedade con forza e da que son partícipes dunha forma cada vez máis alarmante os nosos mozos e mozas. Por iso é fundamental educar na igualdade desde as idades máis temperás a través da familia, a sociedade e, por suposto, a comunicade educativa. Por este motivo, desde a ANPA queremos compartir convosco algúns enlaces interesantes para celebrar este día e educar o resto do ano na igualdade entre nenos e nenas, mozos e mozas, homes e mulleres.
Así, por exemplo, recomendámosvos ver este vídeo preparado polos alumnos do IES Dionisio Gamallo, de Ribadeo no cal, partindo dun reggaeton, revindican o papel da muller.

Tamén podemos botar man de gran cantidade de libros que presentan este tema de forma amena e didáctica para os nenos e nenas. Ós xa sinalados nunha entrada anterior sobre o Día da muller, como Rosa caramelo ou Artur e Clementina, engadimos agora Xela volveuse vampira, de Fina Casalderrey, da colección Contos da igualdade.

viernes, 13 de octubre de 2017

Horario das actividades extraescolares

O vindeiro luns 16 darán comezo as actividades extraescolares, o horario será coma sempre, de 2 a 3 da tarde no recreo de despois de xantar